التغدد الرحمى

هو عبارة عن انفصال بطانة الرحم عن عضلات الرحم . وعادة بيسبب الام اثناء الدورة او الم في اسفل البطن و انتفاخات قبل الدورة . والحالة دي ممكن تحصل في الرحم كله او في بعض اجزاء منه .

التغدد الرحمي حالة حميدة وغير ضارة في حد ذاته بس النزيف والالم اللي بسببه بيكون له تأثير سلبي على حياة المرأة

اعراض التغدد الرحمي :

احيانا المرض ده مبيكونش معاه اي اعراض بس احيانا اخرى بيكون معاه بعض الاعراض زي:

  • نزيف شديد مصاحب للدورة
  • الام شديده اثناء الدورة
  • انتفاخات والام في البطن

اسبابه :

الحقيقة المرض ده سببه الرئيسي غير معروف طبيا حتى الان بس في بعض الدراسات بتقول ان ممكن يكون سببه زيادة في الهرمونات زي الاستروجين والبروجستيرون والبرولاكتين

التشخيص :

لغاية فترة قريبة كان التشخيص الوحيد للمرض عن طريق استئصال الرحم وفحصه تحت الميكروسكوب ولكن التقدم في المجال الطبي خلانا نقدر نشخصه من غير الحاجة للجراحة عن طريق اشعة الرنين او عن طريق السونار المهبلي ….

فمثلا اذا الدكتور شك ان المريضة ممكن يكون عندها تغدد رحمي فبالفحص والسونار هيبان للدكتور ان الرحم حجمه اكبر من الحجم الطبيعي وان عضلات الرحم شكلها مختلف .

والرنين المغناطيسي بيستخدم لتأكيد التشخيص في الحالات اللي بتعاني من نزيف رحمي مجهول المصدر .. وغالبا بيحصل لخبطة في التشخيص ما بين التغدد الرحمي والاورام الليفية .

العلاج :

العلاج في الاساس بيعتمد على الاعراض اللي انتي بتحسي بيها يعني مثلا لو الاعراض كانت بسيطة فالمسكنات العادية هتكون كافية جدا لحالتك بالاضافة لكمادات دافية علشان الالم .

وعادة الدكتور بيوصف المسكنات دي من قبل ما الدورة تبدأ و بتستمري عليها في اول كام يوم من الدورة .

في الحالات الشديدة اللي بتعاني من الم غير محتمل او نزيف شديد ففي الحالة دي الدكتور بيلجأ لاستخدام علاج هرموني زي اللولب الهرموني وده بيختلف عن اللولب العادي في ان بيكون في هرمون حوالين اللولب بيتم افرازه بصورة منتظمة او ممكن يستخدم علاجات هرمونيه تانية .

في وسائل تانية للعلاج برضه زي حقن الشريان الرحمي وده بيمنع الدم انه يوصل للمنطقة اللي فيها التغدد فحجمه هيقل .. وفي علاج برضه عن طريق كي بطانة الرحم وده بيجيب نتيجة كويسة جدا وبيقلل الالم جدا في بعض الحالات  .