التمارين اثناء الحمل

للاسف فكرة الرياضة مع الحمل بتكون صعبة شوية لان الحامل اول ما بتكتشف الحمل بيقولولها نامي على السرير التسع شهور وده طبعا غلط .. بل على العكس تماما الرياضة مع الحمل بتكون مفيده جدا وهتساعد في عملية الولادة وفي رجعوك لنشاطك الطبيعي اللي كنتي عليه بعد ما تولدي .. انا هقولك بعض مميزات الرياضة :

  • هتقلل الام الظهر اللي بتحصل مع الحمل
  • هتعزز طاقتك ونشاطك خلال اليوم
  • هتقلل مشاكل الجهاز الهضمي زي الامساك
  • هتقوي عضلاتك وحالة جسمك العامة وده هيساعدك كتير اثناء الولادة
  • هيزود قدرة تحملك
  • هيخليكي ترجعي لحياتك الطبيعية بعد الولادة بسرعة

البرنامج المناسب :

الرياضة اثناء الحمل مش سهلة ولازم الدكتور هو اللي يكون مشرف عليها لانه بيتعامل مع اجهزة جسمك المختلفة بالاضافة للحمل والتغير الهرموني اللي بيحصلك علشان كدة لازم تكوني على تواصل مستمر مع الدكتور بتاعك .

هتكلم باختصار عن شوية حاجات خاصة بالرياضة :

  • حاولي تتجنبي الرياضة وانتي نايمة خصوصا بعد اول ثلاث اشهر لان الوضع ده ممكن يؤدي لانخفاض عدد ضربات القلب وبالتالي هيقل الدم اللي واصل للجنين .
  • تجنبي برضه فترات الوقوف الطويلة
  • لازم تسمعي لجسمك .. بمعنى انه بتقدم الحمل المساحة حوالين الرئه بتقل وبكدة مده التمرين بتقل وعلشان كدة اول ما تحسي بتعب لازم تاخدي فترة راحة
  • لازم تركزي على التمارين اللي بيكون فيها توازن بين رجلك الاثنين وتجنبي التمارين اللي بتكوني واقفة فيها على رجل واحدة او اللي بتكون على اسطح غير مستوية
  • ابعدي طبعا عن اي رياضات عنيفة او غير امنه
  • لازم تكوني بتاكلي كويس وانتيب تمارسي الرياضة
  • علشان تستفيدي كويس من الرياضة لازم تشربي كميات كبيرة من المياه

موانع الرياضة :

في طبعا موانع للرياضة في الحمل زي ارتفاع الضغط المصاحب للحمل او الانفجار المبكر في جيب المياه او لو انتي حامل في توأم او اكتر

الرياضة ما بعد الولادة :

عاده بنبتدي بعد اسبوعين من الولادة برياضات خفيفة زي المشي .. وبعد كدة ممكن تعملي تمارين خفيفة للجزء العلوي من الظهر .

تمارين البطن ممكن نبدأها بعد ست اسابيع من الولادة لو مفيش مانع طبي