الحمل خارج الرحم

الحمل من الحاجات الجميلة اللي بتحصل لاي واحدة ست ولكن زي اي حاجة في الدنيا … له برضه مشاكله والحمل خارج الرحم ده من اخطر الحاجات اللي ممكن تحصل

علشان نفهم يعني ايه حمل خارج الرحم لازم نعرف الاول الحمل بيتم ازاي … اللي بيحصل في الحمل الطبيعي ان البويضة بيتم تلقيحها في انبوبة فالوب بالحيوان المنوي وبعدها بتتحرك لغاية ما توصل للرحم علشان تتزرع في بطانة الرحم . لو حصل وفي حاجة وقفت البويضة فساعتها بيحصل الحمل خارج الرحم .

الاماكن اللي ممكن يحصل فيها حمل خارج الرحم :

اكتر من 98% من الحمل خارج الرحم بيحصل في انبوبة فالوب . وفي بعض حالات نادرة ممكن يحصل في البطن (خارج الرحم ) او على الكبد او على الطحال وممكن كمان يحصل على المبيض .

اسباب الحمل خارج الرحم :

له عدة اسباب منها :

  • البطانة المهاجرة : في الحالة دي بطانة الرحم بتكون موجودة برة الرحم .
  • تشوهات جنينية في انبوبة فالوب
  • مكان فتح القيصرية السابقة : ودي غالبا بتكون نقطة ضعيفة في جدار الرحم بسبب قيصرية قبل كدة
  • التهابات في الحوض : ودي اسبابها كتير
  • في اسباب تانية برضه زي بعض العلاجات بتاعت تأخر الحمل او اللولب او ان سن الام يكون اكتر من 35 سنة

الاعراض ( ودي حاجة مهمة جدا ) :

بتبتدي عادة بألم شديد اسفل البطن او نزيف حاد وألم زائد اسفل الظهر .. ولو في حالة حدوث انفجار في المكان اللي حصل فيه الحمل الاعراض بتكون اسوأ من كدة بكتير .. ودي بعض الاعراض اللي لازم ناخد بالنا منها :

  • انخفاض مفاجئ في ضغط الدم
  • الشعور المفاجئ بالهبوط والدوخة
  • ألم حاد جدا اسفل البطن وعادة بكون على ناحية واحدة

التشخيص :

التشخيص المبكر من اهم الحاجات اللي الدكتور لازم بياخد باله منها عن طريق السونار والتحاليل

العلاج :

لازم تكوني عارفة ان الحمل خارج الرحم لو ما اتعالجش ممكن يؤدي للوفاه بسبب النزيف علشان كدة الحالة دي بتعتبر طارئه جدا ولازم تدخل سريع فيها … والعلاج ممكن يكون دوائي او بالمنظار او بالجراحة حسب حالة الام نفسها وحسب ما يراه الطبيب وعادة لو الحالة مستدعية للجراحة بيتم استئصال انبوبة فالوب اللي حصل فيها الحمل علشان نسب تكرار الموضوع في نفس الانبوبة بتزيد