الولادة القيصرية

ارتفع معدل الولادات القيصرية  في مصر في الفترة الاخيرة

وعلشان كدة هنتكلم عن الموضوع ده بس باختصار شوية . اول حاجة لازم تعرفيها هي ….

ليه هتولدي قيصري ؟؟؟

الاسباب مختلفة وكتير منها انك تكوني والدة قيصري قبل كده او الجنين ميكونش نازل براسه او ان المشيمة تكون سابقة الجنين او ان يكون في مشكلة في المياه اللي حوالين الجنين ( السائل الامنيوسي)

ممكن تكون قلت او ابتدت تتلوث

دي غالبا الاسباب اللي الدكتور بيقرر فيها يولد الام قيصري.

في اسباب تانية برضه من اهمها ان الام هي اللي تكون عايزة تولد قيصري ومش عايزه تدخل في تجربة الولادة الطبيعي او انها تكون فعلا ابتدت بولادة طبيعي بس الولادة متقدمتش فيضطر الدكتور انه يولدها قيصري.

خطوات الولادة القيصريه :

الصيام :

ودي حاجة معروفة طبعا قبل اي عملية لازم تكوني صايمه من 6 – 8 ساعات

البنج:

وده من الحاجات اللي بتشغل بال اي أم في الدنيا يا ترى هاخد بنج نصفي ( حقنة الظهر ) زي ما معظم الامهات بيسموها او بنج كلي . للاسف الكل بيجري على البنج الكلي بس لازم تعرفي ان كل حاجة لها مميزات وعيوب … باختصار البنج الكلي :هتنامي ولما تصحي هتلاقيهم خلصوا كل حاجة وانت في اوضتك بس من عيوبه ان جزء منه بيوصل للجنين فممكن يكون نايم شوية لما يتولد ودي حاجة بتقلق دكاترة الاطفال بعكس البنج النصفي اللي مبيوصلش منه اي حاجة للجنين بس بتكوني صاحية طول العملية وطبعا اكيد مش هتكوني حاسة بحاجة

( احنا مش هنعملك عملية وانتي حاسة )

الجراحة :

الفتح غالبا بيكون تحت الصرة . والجراح بيفتح كذا طبقة علشان يوصل للجنين وده تقريبا بياخد حوالي ربع ساعة وبعدها بيفتح الرحم علشان يخرج الجنين .

الطفل :

الجنين بيخرج من الرحم حسب الوضع بتاعه قبل العملية .بمعنى ان لو الراس هي اللي تحت هيخرج براسه ولو رجله هي اللي تحت يبقى اكيد هينزل برجله .

المشيمة :

ودي بتنزل لوحدها بعد خروج الجنين .

الخياطة :

بعد كده بتبتدي مرحلة الخياطة وتقفيل الطبقات اللي اتفتحت بداية من الرحم لغاية اخر طبقة خالص وهي الجلد

ليزر ولا مش ليزر:

بيني وبينك مفيش حاجة اصلا اسمها ليزر  ؟!!!!

الخياطة طبعا بتكون تجميل ودي نوعين في خيط بيدوب لوحده ( مبيتفكش) وفي خيط تاني مبيدوبش ( بيتفك بعد اسبوع او عشر ايام ) . وزي ما قلنا كل حاجة لها مميزات وعيوب .

الغيار على الجرح :

اوعي تفتكري انك طالما ولدتي قيصري يبقى خلاص كدة … لا دي عملية ولازم تغيري على الجرح بالطريقة اللي الدكتور بيقولك عليها بالظبط  علشان الجرح يكون كويس وميحصلش التهاب له بعد كدة