بطانة الرحم المهاجرة

هي ايه ؟ مرض البطانة المهاجرة ده بيأثر على الجهاز التناسلي للست . وده معناه وجود وجود نسيج مشابه لبطانة الرحم بس بيكون موجود في مكان غير مكانه الطبيعي … يعني بيكون موجود بره الرحم مثلا المبيضين او انبوبتي فالوب او اي جزء تاني داخل البطن

الاسباب :

اخر الابحاث بتقول ان المرض ده بيأثر على واحدة من كل عشر ستات يعني تقريبا 176 مليون واحده حول العالم وسبب المرض ده غير معروف بس في بعض النظريات بتقول ان في منه بيجي وراثه او نظرية تانية بتقول ارتجاع دم الدورة وده باختصار يعني اثناء الدورة ممكن شوية دم بدل ما ينزلوا من الهبل فيطلعوا ناحية انبوبه فالوب وساعتها الانسجة دي بتنمو في اي مكان في البطن

الاعراض :

اعراض المرض ده بتتفاوت من واحدة للتانية يعني ممكن واحده تكون حاسة بيه على انه ألم بسيط وواحده تانية يكون الألم شديد شوية عندها بس من اهم الحاجات اللي المرض ده بيعملها وبتشغل كل الناس انه بسبب تأخر في الحمل وده غالبا الشكوى عند معظم الناس اللي عندهم بطانة مهاجرة

التشخيص :

افضل حاجة لتشخيص المرض ده هي المنظار

الحمل :

زي ما قلنا ان اهم عرض للمرض هو تأخر الحمل لأن تقريبا ثلث الستات اللي عندهم مرض البطانة المهاجرة بيعانوا من تأخر حمل … لأنه بيسبب مشاكل في المبايض او ممكن في انبوبتي فالوب او ممكن كمان يأثر على البويضة نفسها وبيعمل برضه التصاقات في الحوض

العلاج :

طرق علاج المرض مختلفة ومتفاوتة حسب حالة المريضة فممكن يكون علاج دوائي او تغيير في نمط الحياة الشخصية او علاج هرموني زي حبوب منع الحمل او اخيرا علاج جراحي