مناظير البطن

وده بيتم علشان نقدر نشوف بيه البطن من جوة من غير جراحة ولا فتح للبطن وفي بالنسبة لينا في امراض النساء بنشوف بيه الرحم والمبيضين وانبوبتي فالوب وبيكون فيه تصوير فيديو للحاجات دي

اسباب عمل المنظار :

  • التشخيص : في الحالة دي بنعمل المنظار علشان نشخص الحالة زي في حالة تأخر الحمل مع عدم وجود سبب واضح فبنستعمل المنظار علشان نشوف ايه السبب ولو في التصاقات او اي مشكلة ممكن تتعالج بالمنظار
  • كيس على المبيض : في الحالة دي بدل ما نفتح البطن جراحيا بنستئصل الكيس ده بالمنظار بس خلي بالك مش اي كيس على المبيض ممكن يتشال بالمنظار الموضوع ده في حالات معينة وحسب حجم الكيس
  • البطانة المهاجرة : المنظار من الحاجات المهمة في تشخيص وعلاج البطانة المهاجرة
  • استئصال الرحم : ممكن يتم عمل استئصال الرحم بالمنظار من غير ما نفتح البطن جراحيا
  • ربط انبوبتي فالوب : ودي بتم كوسيلة لمنع الحمل او قبل الحقن المجهري
  • لولب مفقود : في حالة لو اللولب اتحرك من مكانه او خرج من الرحم ممكن نشيله بالمنظار
  • الحمل خارج الرحم : ودي من اهم استخدامات المنظار … اننا ممكن نتخلص من الحمل خارج الرحم بالمنظار بدل فتح البطن جراحيا

مميزات المنظار :

في كتير من المميزات للمنظار عن العملية الجراحية :

  • بيقلل فرص النزيف لان مفيش جرح كبير وبالتالي بتقل احتمالية نقل الدم
  • الجرح طبعا بيكون صغير جدا وبالتالي الالم بيكون اقل بكتير ومش بتحتاجي تقعدي في المستشفى كتير وكمان الجرح بيكون شكله احسن طبعا
  • الالم بيكون اقل وبالتالي مش هتحتاجي مسكنات كتير ( المسكنات بتتعب الكلى والمعدة )
  • بالرغم من ان وقت العملية بالمنظار ممكن يكون اطول نسبيا عن الجراحة بس زي ما قلتلك مش هتقعدي في المستشفى كتير وبترجعي لحياتك الطبيعية اسرع
  • بتقل فرص تعرض الاعضاء الداخلية لأي عدوى خارجية
  • بتقل فرص حدوث التصاقات داخلية عن العمليات الجراحية

عيوب المنظار :

طبعا كل حاجة زي ما لها مميزات .. ليها عيوب برضه :

  • العملية بالمنظار بتكون اصعب بالنسبة للجراح لان المجال الجراحي قدامه بيكون اصغر
  • استخدام الآلات بيكون اكتر وعلشان كدة محتاجة حد يكون شاطر في المناظير