وسائل منع الحمل

وسائل منع الحمل كتير منها الهرموني او طويلة المدى او الطارئة او الدائمة وتفاصيلها اكتر انا هنا هتكلم على النقط المهمة :

انواع وسائل منع الحمل :

طويلة المدى :

ودي اشهرها اللولب و الحقنة

الهرمون :

زي حبوب منع الحمل ( البرشام )

وسائل موضعية :

زي الواقي الذكري او الواقي الانثوي

في حاجات تانية زي القذف الخارجي و الوسائل الطارئة و الوسائل الدائمة زي ربط انبوبتي فالوب او قطع القناة الدافقة عند الرجل

الوسائل طويلة المدى :

هتكلم باختصار عن كل حاجة … الوسيلة دي بتكون طويلة المدى وفي نفس الوقت ممكن نوقفها لو عايزة تحملي تاني .. وهي ميزتها ان بمجرد تركيبها بتنسيها لفترة طويلة ومش بتحتاجي مثلا انك تاخدي قرص يوميا في نفس الميعاد فتتلخبطي … وهما عبارة عن نوعين :

اللولب : وده ممكن يفضل معاكي خمس سنين او اكتر حسب نوع اللولب

الحقنة : ودي بتتاخد تحت الجلد وبتقعد مدة طويلة نسبيا (ثلاث سننين او خمس سنين )

الوسيلة الهرمونية :

ودي من اشهر وسائل منع الحمل وليها نوعين برضه :

حبوب فيها استروجين وبروجيستيرون مع بعض

حبوب فيها بروجيستيرون فقط

الحبوب دي لازم تتاخد يوميا بس ليها فعاليه بنسبة 99% لو انتي اخدتيها بالطريقة الصح

الحقنة اللي بتتاخد كل ثلاث شهور والحلقات المهبلية برضه بتعتبر من وسائل منع الحمل الهرمونية

الواقي :

الواقي ده وسيلة بتمنع الحيوانات المنوية من انها تدخل الرحم وده في منه ثلاث انواع :

الواقي الذكري ,الواقي الانثوي والحواجز

الوسائل الطارئة :

ودي بنستخدمها في الحالات دي :

لو حصل علاقة بين الزوجين من غير ما يستخدموا وسيلة منع حمل

لو بنستخدم الواقي وحصل فيه قطع اثناء العلاقة

لو بتستخدمي حبوب منع الحمل ونسيتي تاخدي حبايتين او اكتر

لو نسيتي ميعاد حقنة منع الحمل

الوسائل الدائمة :

ودي زي ما قلت ممكن بتم عن طريق ربط انبوبتي فالوب او قطع القناة الدافقة عند الرجل